LAOAG CITY – Kinumpirmaran ni Chairman George Erwin Garcia a nangiyisyu ti subpoena ti Commission on Elections (COMELEC) Law Department kontra ken ni Lawrence Lubiano, ti Presidente ti Centerways Construction and Development Inc. ken campaign contributor ni Senador Chiz Escudero idi 2022 elections.
Daytoy ket mainaig iti reklamo nga inpila ni Atty. Jesus Falcis kontra iti Senador gapu iti maipagarup a panaglabsing iti Omnibus Election Code kalpasan nga immawat ti P30 million campaign donation manipud iti maysa a contractor idi panawen ti kampania.
Inbatad ni Chairman Garcia nga inyunada a pinaayaban dagiti contractor wenno contributor sakbay mismo dagiti kandidato a naipaayan ti donasion.
Iti immuna a motu proprio investigation ti Political Finance and Affairs Department, naibasura ti kaso kalpasan a nakita a saan a panaglabsing iti Omnibus Election Code ti P30 milyon a donasion nga inpaay ni Lubiano ken ni Escudero gapu ta agduma ti legal nga entidad ti contractor ken ti kompania.
Nupay kasta, kuna ni Garcia, awan ti epekto ti resulta ti imbestigasion ti Political Finance and Affairs Department iti law department gapu iti kaso ita ket adda ti nagreklamo ken supsuportaran dagiti dokumento ken ebidensia.
