LAOAG CITY – Natiliw ti maysa a construction worker kalpasan a naglako ti maipagarup nga iligal a druga iti maysa a kameng ti PDEA a nagpammarang a gumatang iti iligal a druga.
Naiyuswat ti buy-bust operation iti Lacuesta St., Brgy. 2, Pagdilao, iti ili ti Pinili.
Nabigbig ti suspek a ni Louie Lloyd Pagala y Beltran, agtawen ti 27, agin-indeg iti Brgy. 14 Tartarabang, Pinili idinto a residente iti Brgy. Abkir iti ili ti Vintar.
Segun ti PDEA, maibilang ti suspek iti Regional Level ken Top 10 iti PDEA.
Nakumpiskar dagiti otoridad dagiti lima a sachet a naglaon ti maipagarup a shabu iti ikot na, maysa a sachet a naglaon ti maipagarup a shabu a nagatang ti PDEA agent, 1,000 peso bill marked money, maysa a cellphone ken ti naglugananna a motorsiklo.
Kabayatanna, kuna ni Barangay Chairman Edward Antalan iti Brgy. Tartarabang, awan ti napuut na a nakairamramanan ti suspek.
Naamuan ti Bombo Radyo Laoag nga agnanaed ti suspek iti Brgy. Tartarabang gapu ta adda ti kabagyan na ken agtrabtrabaho kas construction worker idinto a dagiti nagannak kenkuana ket agnanaed iti ili ti Vintar.
