LAOAG CITY – Kinumpirmaran ni P/Capt. Melvin Soriano, ti chief of police iti ili ti Currimao a ti nakatayan ti biktima a nakita nga agtatapaw iti baybay iti paset ti Barangay Pangil iti nasao nga ili ket maipagarop a traumatic brain injury.
Nabigbig ti biktima a ni Mr. Keneth Fernandez, agtawen ti 28, awanan ti asawa ken residente iti Barangay 17, Tabug iti siudad ti Batac.
Segun ken ni Soriano, nakita ti sugat iti muging ti biktima nga addaan ti kauneg a maysa a pulgada.
Kuna pay ni Soriano a basar iti imbestigasyon da ket naamoan a ti biktima ket agpaspasar ti mentally challenged.
Naamoan da pay a naudi a nakita ti biktima iti Barangay Naguirangan iti ciudad ti Batac iti oras ti alas-9:30 ti rabii idi domingo, Abril 26.
Innayon na a gapu ta adda ti nakita da a sugat ti muging ti biktima ken ti indeklarar ti doktor a nangtaming kenkuana a ti nakatayan na ket traumatic brain injury ket saan da nga iwalin nga adda ti foul play iti pannakatay na isut gapuna nga agtultuloy ti naig-iget nga imbestigasyon da.
Inbatad pay ti chief of police a kitaen da pay no adda dagiti Closed Circuit Television a mabalin a nakaala no kasanu a nakadanun ti biktima iti rock formation iti Barangay Pangil iti ili ti Currimao.
Mainaig iti daytoy, kuna ni Soriano nga al-allukuyen da ti pamilya ti biktima nga ipadalan da daytoy iti otopsiya tapno maamoan no ania ti pudno a nakatayan na.
Immuna iti daytoy, inpakaammo ni Soriano nga adda ti maysa a concerned citizen a nangipakaammo kadakuada a mapan koma agdigos iti baybay ngem nariparna nga adda ti bangkay nga agtatapaw.
Inbatad na a basar iti medical assessment ti doktor ti Rural Health Unit ket awan pay ti 12 nga oras a pimmusay ti biktima kalpasan a nakita daytoy.
