LAOAG CITY – Pormalen a napilaan ti kaso a theft ti maysa a construction worker kalpasan a nagtakaw iti uppat a kalding iti ili ti Marcos.
Nabigbig ti suspek nga agtawen ti agtawen ti 49, addaan iti live-in partner, construction worker, tubo manipud iti Sitio Saranay, Brgy. Caribquib iti ili ti Banna ken agdama nga agnanaed iti Sitio Bannuar ti Brgy. Daquioag iti ili ti Marcos.
Inlawlawag ni P/Maj. Joemar Andres, hepe ti Philippine National Police iti ili ti Marcos a napilaan ti suspek ti kaso a kas regular filing agsipud ta naladaw daytoy a naireport iti polisia.
Kinunana a maiyur-uray laengen ti warrant of arrest kontra iti suspek tapnu a maarestar ti nasao a suspek.
Maipalagip a naireklamo ti suspek a nagtakaw ti uppat a kalding rason nga nangiwayat dagiti otoridad ti naan-anay nga imbestigasion agingga a naduktalanda a maysa a kadagiti natakaw a kalding ket nailako iti ili ti Sarrat.
