LAOAG CITY – Naipisuken iti Ilocos Norte Provincial Jail (INPJ) ti suspek a nanggandat a mangrames ken nangdangran iti maysa nga ina pakairamanan ti asawa ti babai iti paset ti Barangay Canaam iti ili ti Vintar.
Nabigbig ti suspek a ni Daryl Badua y Lagmay, agtawen ti 23, naasawaan, construction worker ken residente iti Brgy. Isic-Isic iti ili ti Vintar.
Iti imbestigasyon ti Philippine National Police (PNP) iti ili ti Vintar, kabayatan a matmaturog dagiti agasawa a biktima kadwa da ti anak da a siyam a bolan a maladaga ket napan ti suspek iti barracks da ken ginandat na nga ikkaten ti ules dagitoy.
Nakariing ti babai nga adda ti mangguyguyud iti ules da ken maipagarop a mangkarkarawa kenkuana a sabali a lalaki isut gapuna a riniing na ti asawa na.
Nupay kasta, ditoyen a napan innala ti suspek ti martilyo dagiti biktima nga isu met ti inusar na a nangmartilyo kadakuada kangrunaan na ti ulo dagiti agasawa.
Inkarigatan ti lalaki a linabanan ti suspek ken inbilin na iti asawa na a mapanda aglemmeng iti anak da ngem sinurot latta ti suspek ti babai.
Sakbay a nakaasideg ti suspek iti agina ket nadlaw na nga adda ti umas-asideg a tao isut gapuna a nagdardarasen a pimmanaw iti lugar.
Naitaray dagiti agasawa iti Governor Roque Ablan Senior Memorial Hospital (GRASMH) ditoy ciudad ti Laoag para iti naan-anay a pannakataming da.
Natiliw met dagiti otoridad ti suspek iti GMW bus terminal ditoy ciudad ti Laoag.
Gapu iti daytoy, napilaan ti suspek ti kaso a panagrames ken frustrated murder.
Naamoan a nabartek ti suspek idi napasamak ti insidente.
