LAOAG CITY – Nakita a maysan a nalamiis a bangkay ti maysa a construction worker iti Barangay Cabittauran iti ili ti Nueva Era.
Nabigbig ti biktima nga adda iti umno a tawen, awanan asawa ken residente iti nasao met laeng a barangay.
Basar iti Nueva Era Municipal Police Station, agarup ala una ti malem, kabayatan a magmagna ti dua a babbai nga agpada a residente ti Barangay Cabittauran nga agturong iti Balay ti Tribu ket nakitada ti bangkay ti biktima nga agtatapaw iti karayan nga adda iti kauneg nga agarup 10 agingga 15 a metro.
Gapu iti daytoy, insigida nga in-report dagiti maseknan a nakita iti Nueva Era Municipal Police Station.
Iti imbestigasion, agarup alas siete ti rabii, kalpasan ti panagiinum iti construction site iti Barangay Cabittauran, timmalaw ti biktima ken naglugan iti bisikleta daytoy tapno agawiden iti pagtaenganda.
Mainaig iti daytoy, agarup 2:30 ti malem, nakita ti bangkay ti biktima no sadinno a nangiwayat ti on-site examination ni Dr. Kashmere Q. Lara-Degollado, Municipal Health Officer ti Rural Health Unit ken indeklararna a natay ti biktima iti oras ti 2:39 ti malem.
Segun iti external examination ti doktor, awan ti nakita wenno pagilasinan nga adda ti foul play a napasamak.
Naammoan a nakita ti bangkay ti biktima sumagmamano a metro ti kaadayona manipud iti bisikleta daytoy a nakasuot ti nalabbaga a bado, brown shorts ken nagsagaba ti sugat iti ulo.
