LAOAG CITY – Inanunsio ti maysa a kompanya nga agararamid ti kutson ken Koala Japan ti “Matt Race by Koala,” daytoy ket maysa a 90-minute sleep competition a maangay inton Oktubre 5 idiay Tokyo.
Impakaammo ti kompanya a libre ti makipagpaset ngem inlawlawagda a no sumobra ti bilang dagiti aplikante ket maaddaan ti special draw wenno binnunotan no siassinno ti maibilang iti listaan ti pinal a partisipante.
Iti nasao a kompetision, agdata dagiti partisipante bayat a nakasuot dagitoy ti sleep-tracking device.
Matukad ti kalidad ti panagturogda, kinaalistoda a maala ti turogda ken no kasano katibker ti panagturogda bayat ti sumagmamano a challenges.
Manipud kadagiti nadakamat a criteria, ma-summarize ti “sleep score” babaen ti pannarabay dagiti health professionals.
Iti baet daytoy, segun iti nasao a kompanya, ti partisipante a makaala ti kangatoan nga iskor ket iso ti agbalin a kampeon ken maipaayan ti 2.22 million yen wenno P893,000.
Kabayatanna, segun kadagiti organizers, maipawil ti panagpuyat ken ti panagusar ti sleeping pills sakbay ti nasao a kompetision.
