LAOAG CITY – Nangipila ti reklamo ni Atty. Manases Reyes Carpio, asawa ni Vice President Sara Duterte iti Quezon City Prosecutor’s Office kontra kadagiti opisial ti Bangko Sentral ng Pilipinas (BSP), Anti-Money Laundering Council (AMLC) ken sumagmamano a pannakabagi ti House of Representatives.
Karaman kadagiti innaganan iti reklamo ket ni Bangko Sentral ng Pilipinas Governor Eli Remolona Jr., Anti-Money Laundering Council Executive Director Ronel Buenaventura ken dagiti miembro ti House Justice Committee nga isuda Reps. Gerville Luistro, Percival Cendaña, Chel Diokno ken Leila De Lima.
Basar iti kampo ni Carpio, ti reklamo ket mainaig iti maipagarup a panaglabsing iti Anti-Money Laundering Act, Bank Secrecy Law ken Data Privacy Act.
Ak-akusaranna dagiti opisial nga iligal nga inbutaktak ti “classified confidential banking records” a protektado ti linteg.
Inpetteng ti kampona, napukawan isuna ti gundaway a makaipila ti legal a depensa para iti bagina, pamilia ken ti banking community.
Dinakamat ti abugadona a saan a sakup ti reklamo ti kinapudno dagiti naiparuk-at a “suspicious transactions” iti House Justice Committee no diket nakasentro laeng iti maipagarup a panaglabsing kadagiti maipatpatungpal a linteg.
Iti nasao a panagdengngeg, in-report ti Anti-Money Laundering Council nga adda ti sumurok P6 bilyon a transaksion a konektado ken ni Carpio ken iti Bise Presidente pakairamanan ti P4.525 bilyon a simrek iti accounts-da, P1.554 bilyon a rimmuar ken P791 milyon a saan a masinunuo no inflow wenno outflow.
Inawagan ni Carpio ti nasao a panangibutaktak kas “black propaganda” ken “political harassment” a gagem a dadaelen ti reputasion ti pamilia Duterte.
Innayon pay ti legal counsel-na, ni Carpio ket maysa a pribado nga indibidual ken saan a paset ti impeachment proceedings.
