LAOAG CITY – Inkari ti Department of Agriculture (DA) a tulungan dagiti mannalon a naapektaran gapu iti nababa a farmgate price ti kamatis.
Immunan nga inreklamo dagiti mannalon ti panagbagsak ti farmgate price ti kamatis iti P4 agingga iti P8 iti kada kilo isu a pilpilien dagiti dadduma a saan lattan nga agmula gapu ta dakdakkel ti magastos iti panagmula maidasig iti pamastrekda no ilako dagitoy.
Inbatad ni Department of Agriculture Spokesperson Assistant Secretary Arnel de Mesa, manarimaan ti pannakikoordinar dagiti local office ti Department of Agriculture kadagiti mannalon tapno maiyasideg ti maiyannatop a tulong kadakuada.
Naammoan a maysa kadagiti maisingsingasing ditoy ket ti adu a market linkage, transportation/logistics ken dadduma pay.
Kabayatanna, karaman kadagiti nalawa a pagmulaan ti kamatis ket iti Cordillera, Ilocos Region, Central Luzon ken Cagayan Valley a kangrunaan nga agsupsuplay kadagiti dadduma a paset ti pagilian kas ti National Capital Region.
