LAOAG CITY – Saan a makadalyasat dagiti dadakkel a lugan gapu ta madalapos ti waya ti kuriente iti Barangay Lagui-Sail ditoy siudad ti Laoag.
Segun ken ni Mr. Rodrigo Pimentel, foreman ti maar-aramid a kalsada iti nasao a barangay nga insigida a solbarenda daytoy a problema dagiti naruay a motorista.
Inlawlawagna a no ingatngatoda pay ti ginaburanda a dalan ket ad-adda a madalapos ti waya ti kuriente ken saanen a makadalyasat pay dagiti dakkel a klase ti lugan.
Inpasingkedna a kitaenda a nasayaat no ania ti napintas nga aramidenda tapno saan a maapektaran dagiti motorista nangruna kadagiti agiturturong kadagiti dadakkel a lugan.
Naammoan nga adda met ti alternatibo a kalsada a mabalin a pagdalyasat dagitoy ngem adayo unay.
Immuna iti daytoy, maamak dagiti driver dagiti dadakkel a lugan iti panagdalyasatda iti nasao a kalsada gapu ta madalaposda ti waya ti kuriente a posible a mangitunda ti desgrasia.
