LAOAG CITY – Agpabuya dagiti amin a nangabak iti Tan-ok ni Ilocano Festival of all Festivals ita a tawen 2019 iti ili a Badoc ita nga aldaw Pebrero singko.
Segun kenni Provincial Tourism Mr. Aianree Raquel, paset daytoy iti pannakidanggay ti probinsia iti daytoy naindaklan nga aldaw a pormal a pannakaideklarar ti panagbalin ti St. John the Baptist Church a Basilica Minore.
Imbatadna a nakapatpateg ti nadakamat nga aldaw gapu ta manamnama a malaksid iti panagbalinna nga importante a lugar para kadagiti deboto ket dakkel pay ti maitulongna para iti panagbalin ti Ilocos Norte a mabigbig iti “pilgrim tourism” wenno “faith tourism”.
Inlawlawag ni Raquel nga agsala dagiti walo a nangabak iti tan-ok kalpasan ti misa mainaig iti naan-anay a panagbalin ti simbaan ti Badoc a Basilica Minore.
Innayonna a likmuten dagiti maseknan ti plaza iti nadakamat nga ili kas pangparagsak iti nasao a naindaklan a pasken saan laeng a ti Badoc ngem ti intero a probinsia.
