LAOAG CITY – Patien dati a Konsehal Mark Dennis del Castillo iti ili ti Solsona a panagibales ti rason iti ar-aramiden ti Sang. Bayan seknan iti isyu iti Pabahay Project iti nasao nga ili.
Daytoy ket kalpasan ti addang ti Sang. Bayan a panangipasa ti maysa a resolusyon a mapilaan ti kaso ni Del Castillo seknan iti daytoy a banag.
Segun kenni Del Castillo, ti ammo na nga inpasa ti konseho a resolusyon ket ti panangipaay ti otorisasyon kenni Mayor Joseph de Lara nga agtignay iti report ti ad-hoc committee.
Inpetteng na nga idi pay laeng 2017 daytoy a proyekto ken naiyuswat ti bukod nga imbestigayon ti Konseho ngem agpapan ita ket awan met ti naipila a kaso kontra kenkuana no adda kuma ti ebidensya wenno kongkreto a pammaneknek a mangitudo kenkuana nga adda ti basol na.
Inpalgak na a ti panagibales daytoy kas sungbat na dagiti saludsod no apay nga ita laeng a mairuwar gapo iti inpila da met a kaso iti Ombudsman idi 2015 kontra kenni Mayor De Lara, Bise Mayor De Lara ken dadduma pay ken nadesiyonan a mapilaan dagiti maseknan iti Sandiganbayan.
Inlawlawag na nga isuna a mismo ti mangifol-follow up iti daytoy ken inpakammo na nga ita ket adda ti manarimaan nga iriing da a kaso kontra kadagiti maseknan.
Mainaig iti daytoy, kuna ni Del Castillo nga awan pay ti aramiden na nga addang gapo ta awan met ti naawat na a promal a reklamo kontra kenkuana ket gapo ta isuna ket maysan a pribado a tao, saanen a mabalin ti kaso administratibo.
Innayon na a saan a rumbeng nga isuna ti mapabasol no diket ti lokal a gobierno ti Solsona gapo ta ti Breach of Contract gapo ta nakailanad iti Memorandum of Agreement pinirmaan ti LGU ken Dept. of Social Welfare and Development ket saan a mangipaay ti pinansyal ngem rumbeng ti technical support kas iti engineer, foreman ken skilled workers.
Nupay kasta, awan pulos ti inpaay ti lokal a gobierno iti laksid ti kanayon na a kiniddaw a tumulong daytoy iti nasao a proyekto no diket ti inaramid ti munisipyo ket ti agitudo wenno agpabasol.
Gapo iti daytoy, inpetteng na a rumbeng kuma met a mapilaan ti lokal a gobierno ti Solsona ti Gross Negligence.
Kabayatanna, mamati nga awan ti nagbasolan na iti daytoy nga isyu.
Maipalagip a makweskwestyunar ti Pabahay Project gapo ta maipagarop a ti balor dagiti materyales a naited kadagiti 177 a benipisyaryo ket kurang wenno saan nga agbalor ti 21 a milyon a pisos nga isu ti naited a pondo manipud iti Dept. of Social Welfare and Development.
