LAOAG CITY – Inrakurak ni dati a Senador Panfilo Lacson nga agpaidasig daytoy iti kina-Senador kas independent candidate iti baet a karaman isuna iti senatorial slate ti administrasion ni Presidente Ferdinand Marcos Jr.
Inbatad ni Lacson a karaman isuna iti Alyansa para iti Bagong Pilipinas administration coalition gapu ta nagbalin a guest candidate daytoy ti Nationalist People’s Coalition (NPC).
Ti administration coalition ket bukbuklen dagiti kandidato nga indasar ti Partido Federal ng Pilipinas (PFP), NPC, Lakas-Christian Muslim Democrats ken Nacionalista Party ni Marcos.
Nupay kasta, inlawlawag ni Lacson nga ipanpannakkelna a karaman isuna iti administration coalition para iti midterm elections gapu ta kalikagumna a makasubli iti Senado kalpasan a napaay iti presidential bid idi 2022.
