LAOAG CITY – Natay ti maysa a lalaki kalpasan a pinaltu-paltugan dagiti riding-in tandem suspects iti mismo a pagtaengan na idiay Brgy. Mabusag Norte iti ili Badoc idi rabii.
Nabigbig ti biktima a ni Mr. Fresnel Aganon y. Gaoat, agtawen ti 36, dati nga OFW ken residente iti nasao a barangay.
Segun ti imbestigasyon ti PNP, naggapo ti nasao a biktima iti pagpyestaan ken possible a sinurot dagiti suspek ket dita a pinaltu-paltugan da bayat iti isasangpet na iti mismo a pagtaengan na.
Naitaray a dagus iti ospital ti biktima ngem naideklara a dead on arrival.
Inbatad ni Pol. Captain Joseph Tayaban, ti chief of police iti ili a Badoc, rumrumuar iti imbestigasyon da a “love triangle” iti makagapo iti napasamak a pammaltog gapu ta maipagarop nga ado ti karelasyon ti nasao a biktima.
Kabayatanna, nakarekobre dagiti kameng ti pulisya iti 4 a basyo ti bala ti kalibre 45 a paltog iti nakapasamakan ti krimen.
Agtultuloy ti imbestigasyon ti PNP seknan iti nasao a pasamak.
