LAOAG CITY – Natiliw iti drug buy-bust operation ni Patrick John Uy, agtawen iti 23, baro, dati nga SK kagawad ken residente iti Barangay 20 ditoy ciudad ti Laoag.
Nakumpiskar dagiti otoridad iti ikot ni Uy ti 11 a sachet a naglaon ti mapagarop a marijuana, 2 a ziplock a naglaon met laeng ti napagango a bulong ti marijuana, maysa nga homemade a paltog nga addaan ti tallo a bala ti 5.56 a paltog.
Iti interview ti Bombo Radyo Laoag ken ni Uy, inpetteng na a saanna a bagi dagiti ebidensya a naala kontra kenkuana.
Kabayatanna, kinumpirmaran ni Barangay chairman Edgar Torio iti nasao a barangay a ti akusado ket naelektaran idi napalabas nga eleksyon kas sk kagawad ngem pinilit dagiti pada na nga SK official a nagresign kalpasan a saan a dimmalan iti mandatory training.
