LAOAG CITY – Dead on the spot ti maysa a lalaki kalpasan a naidungpar ti nagluganan na a motorsiklo iti puun ti kayo idiay ili ti Banna.
Nabigbig daytoy a ni Alfredo Austria y Agustin, agtawen ti 64, naasawaan, maysa a mannalon ken residente ti Brgy. Fortuna iti ili ti Marcos.
Segun ti PNP-Banna, kabayatan a taltalantanen ni Austria ti Ilocos Norte-Abra road iti paset ti Brgy. Carribquib, Banna ket napukawan ti kontrol iti inturong na a matorsiklo.
Gapo iti daytoy, naidungpar ti biktima iti puun ti gmelina a nangitunda ti dagus nga ipapatay na gapo ti sinagaba na a nakana a sugat ti ulo na.
Rumrumwar a ti biktima ket napan nakiminatay iti paset ti Brgy, Cristina iti nasao nga ili ken idi agawiden ket ditoy a napasamak ti insidente.
