LAOAG CITY – Immapela manen ti defense team ni dati a Presidente Rodrigo Duterte para iti pannakadiskwalipika ti dua a pre-trial judges ti International Criminal Court (ICC) manipod iti pannakaiyuswat ti desisyon iti hurisdiksiyon ti tribunal iti reklamo a crimes against humanity kontra iti dati a presidente.
Maipalagip nga immunan a kiniddaw ti kampo ti dati a Presidente idi Mayo primero ti partial recusal wenno saan paylaeng a pannakipaset da ICC pre-trial Judges María del Socorro Flores Liera ken Reine Adélaïde Sophie Alapini-Gansou manipod iti proceedings gapu iti maipagarop a “perceived bias”, ngem inbasura daytoy ti International Criminal Court Pre-Trial Chamber idi Mayo 5.
Iti sabali manen a request nga inpila ti defense lawyer ti dati a presidente a ni Nicholas Kaufman iti International Criminal Court Presidency, kiniddaw na ti pannakaidiskwalipika dagiti dua nga ICC judges gapu iti isyu ti hurisdiksiyon.
Daytoy ket basar iti Rules of Evidence and Procedure ti International Criminal Court, ti ICC Presidency a bukbuklen ti ICC President, first vice president ken second vice president ti agdesisyon kadagiti request tapno i-excuse wenno i-diskwalipika ti judges manipod iti panag-exercise kadagiti trabaho da.
Nupay kasta, gapu ta ni Alapini-Gansou ti tumaktakder a second vice president ti International Criminal Court, kuna ni Kaufman a masapol a madiskwalipika daytoy manipod iti panagdesisyon iti request da.
Immunan nga inpetteng ni International Criminal Court prosecutor Karim Khan a napaay ti defense team a nangipakita no ania ti iyak-akusar da a “perceived bias” ti dua nga ICC judges.
Maipalagip a karaman da Alapini-Gansou ken Flores Liera a nagpirma iti warrant of arrest kontra ken ni dati a Presidente Duterte.
