LAOAG CITY – Nangipila ti kampo ni Vice President Sara Duterte ti panagi-waive ti cross-examination iti maysa kadagiti testigo ti House Prosecution iti agtultuloy nga impeachment trial gapu iti kinakurang ti isyu a masapol a kontraen iti testimoniana.
Segun ken ni Defense Spokesperson ken counsel Atty. Michael Poa, saandan a kwinestionaran ti testimonia ni dati a government Bank department manager Violeta Constantino mainaig iti pannaka-en-cash ti uppat a tseke nga agdagup ti sag-P125 million ni dati nga Office of the Vice Preident (OVP) Special Disbursing Officer a ni Gina Acosta, kas paset ti pannakaitalantan iti Article I ti impeachment complaint.
Mainaig iti daytoy, inbatad ni Poa nga agbalin a “petty” ti kanayunan pay a saludsod gapu ta saan met a kueskuestionaran ti depensa ti maipagarup “unusual” a panag-en-cash kadagiti tseke.
Innayon pay ni Poa a ti panangiladawan ti testigo nga “unusual” ti nasao a cash withrawals ket personal nga opinion ke saan a nakaapektar kadagiti isyu iti impeachment court.
Kabayatanna, mainaig iti nagbalin a cross-examination ken ni dati a Government Bank-DepEd branch manager Nenita Camposano ket segun ken ni Poa, kalikagum ti depensa nga malawlawagan ti nagbalin a testimonia dagiti testigo mainaig iti panagdalan ni dati a DepEd Special Disbursing Officer a ni Edward Fajarda iti fire exit kalpasan a naalana ti nasao a kuarta tapno maliklikan ti aniaman a saan nga umno nga interpretasion iti panagusar ti nasao nga exit door.
