LAOAG CITY – Inpetteng dagiti abogado dagiti biktima ti extrajudicial killings a masapul a agsardeng iti “delaying tactics” nga ar-aramiden ti kampo ni dati a Presidente Rodrigo Duterte a manglapped iti panagdur-as ti kaso.
Daytoy ket kalpasan a pinasingkedan ti International Criminal Court (ICC) ti hurisdiksion na iti imbestigasion kontra ken ni Duterte mainaig iti mapapati a panaglabsing iti karbengan ti tao iti babaen ti kampania kontra droga.
Segun kenni Atty. Neri Colmenares, umdasen ti naukkon nga ebidensia ti ICC tapno maituloy ti imbestigasion kenni Duterte.
Inbatad ti dati a presidente a saan nga isu ti responsable ken inawagan na ti addang ti ICC a panaglabsing iti soberanya ti Pilipinas.
Iti laksid ti panagikkat ti pagilian iti Rome Statute idi 2019, napagtalinaed ti ICC ti hurisdiksion kadagiti krimen a napasamak idi miembro pay laeng ti Pilipinas.
Mangnamnama dagiti biktima a daytoy ti mangted iti hustisia kadagiti rinibu a biktima ti war on drugs.
