LAOAG CITY – Agpanpanawagan ti Department of Education (DepEd) iti Philippine National Police (PNP) ken dadduma pay a law enforcement agencies a paigetan ti panangipatungpal ti panagusar ti paltog kalpasan a nasugatan ti maysa nga ubing nga agtawen ti 9 nga estudiante idiay General Santos City no sadinno nga aksidente a pimmutok ti maysa a .38 caliber revolver nga ay-ayamen ti ubing ken dagiti pagayamna.
Segun ken ni Education Secretary Sonny Angara, ti insidente ket adda ti pakainaiganna ti panagiggem dagiti agtutubo kadagiti paltog a maibilangen daytoy a nakaam-amak.
Inpettengna a rumbeng a paigetan ti pannakaipatungpal ti responsable a gun ownership pakairamanan ti ad-adda a naiget a background checks kadagiti agal-ala ti lisensia ti paltog, regular nga inspeksion iti umno a panagidulin dagiti paltog ken ad-adda a naiget a kampania kontra kadagiti agus-usar ti iligal a paltog.
Inbatadna a nupay kangrunaan a ti Philippine National Police ti mangisaysayangkat ti panag-regulate dagiti paltog ken panangiyisyu ti permits ket napateg ti papel dagiti nagannak para iti umno a panangisuro ti umno a gun safety kadagiti annakda.
Kunana a rumbeng a suroan dagiti ubbing a saan nga agiggem ti paltog, ammoen ti risgo daytoy ken insigida nga ipakaammo kadagiti nataengan no adda makitada a paltog.
Kabayatanna, inpetteng ti Department of Education ti naiget a pannakaipatungpal ti zero-tolerance policy kontra iti panagitugot ti paltog, bala ken natatadem a banag ken dadduma pay pagpabettak iti uneg ti pagadalan ken iti amin nga school activities kas maiyataday iti Guidelines on Ensuring a Safe and Motivating Learning Environment.
Nabilin pay dagiti pagadalan a paigetan ti security protocols, mangisayangkat ti inspeksion, regular risk assessment ken insigida nga ipakaamo iti Philippine National Police ti aniaman nga illegal nga armas a makita kadagiti estudiante.
