LAOAG CITY – Nagballaag ni Department of Interior and Local Government Sec. Benhur Abalos nga umabot agingga iti 1-milyon a pisos ti agbalin a multa dagiti operator dagiti colorum a lugan.
Gapu iti daytoy, binallaagan ni Abalos dagiti colorum a lugan a saan a rumuar gapu ta inpasigurado na a matiliw dagitoy ken maimpound.
Basar iti Joint Administrative Order No. 2014-01, ti first offense kadagiti matiliw a colorum a bus ket mamulta ti 1-milyon a pisos idinto a dagiti van ken truck ket agmulta ti 200 a ribo a pisos idinto a P120,000 ti multa dagiti sedan vehicles, ken P50,000 para kadagiti colorum a jeep.
Iti second offense ket mabalin nga ikkaten ti Certificate of Public Convenience; madiskwalipikar kas operator; iraman iti blacklist dagiti authorized units ti operator; ken ikkaten ti rehistro dagiti lugan ti operator.
Immunan a napagtutulagan ti Department of Interior and Local Government, Department of Transportation, ken Metropolitan Manila Development Authority a mangbukel da ti Joint Task Force a mangparmek kadagiti colorum a lugan iti National Capital Region.
Inbutaktak pay ni Abalos nga inbilin kadakuada ni Presidente Ferdinand Marcos Jr. a solbaren ti isyu dagiti colorum vehicles ken aramiden da amin a kabaelan da tapno maalay-ayan ti nakaro a trapiko iti Metro Manila.
Inpakaammo ni Abalos a ti Joint Task Force ket mangiyuswat pay ti road-clearing operations ken ad-adda a padur-asen da ti traffic management ken enforcement efforts no sadinno a dagiti member-agencies ket maaddaan ti bileg nga agisyu ti notices of violation ken citation tickets.
