LAOAG CITY – Inrakurak ti Department of Migrant Workers (DMW) nga im-imbestigaren da no adda pay ti dadduma nga opisyal a karaman iti maipagarop a maanomalya a P1.4-billion land acquisition deal a sinerrek ni naikkat nga Overseas Workers Welfare Administration (OWWA) administrator Arnell Ignacio.
Segun ken ni Department of Migrant Workers Secretary Hans Leo Cacdac, agtultuloy ti panagkalap da ti impormasyon ken ebidensiya maipanggep iti nasao a kontrata sakbay da nga agpila ti maiyannatop a kso kontra kadagiti karaman iti nadakamat a katulagan nga awan ti pammalubos manipod iti board ti Overseas Workers Welfare Administration.
Inbatad met ni Department of Migrant Workers Undersecretary Patricia Yvonne “PJ” Caunan a nangsukat ken ni Ignacio kas mangidadaulo iti Overseas Workers Welfare Administration, agserbi koma nga halfway house wenno dormitory-type accommodation ti overseas Filipino workers a maipatakder iti asideg ti Ninoy Aquino International Airport (NAIA) Terminal 1, ti sinerrek a P1.4-billion land purchase deal.
Immunan nga inrakurak ni Cacdac nga adalen da a naimbag no mabalin a mabalewala ti nasao a P1.4-billion deal.
Innayon na nga ad-adalen paylaeng ti Department of Migrant Workers no ituloy da wenno saan ti nasao a proyekto.
