LAOAG CITY – Nakasaganan ti Department of Energy (DOE) a sumango ken agpalawag iti Senado mainaig iti napasamak a nagsasaruno a rotational brownout kadagiti nagduduma a paset ti pagilian.
Inbatad ni Department of Energy Secretary Sharon Garin a manarimaan ti pannakikoordinarda iti National Grid Corporation of the Philippines (NGCP) ken Energy Regulatory Commission (ERC) ken dadduma pay nga ahensia ti gobierno tapno masolbar ti problema iti kuryente.
Nupay kasta, inadmitir ni Garin a nangato ti demand ti kuryente iti Visayas ken Mindanao gapu iti panawen ti kalgaw isut gapuna a kurang ti suplay iti nasao a rehion.
Kunana a dakkel a problema ti sobra a kinapudot ti paniempo a mangitunda ti pannakadadael ti sumagmamano a planta ti kuryente.
Inpettengna a daytoy ti rason no apay a bimmassit ti suplay ken reserba a kuryente iti agdama.
Naammoan nga umab-abot iti tallo agingga lima a tawen ti panangipasdek kadagiti planta isu a marigatan pay a mapatibker ti suplay ti kuryente iti Visayas ken Mindanao.
Iti baet daytoy, inpasigurado ni Garin nga ar-aramidenda ti amin tapno manayonan ti suplay ti kuryente.
