LAOAG CITY – Naalarma ti Executive ti Department of Health ti baro a panagngato ti kaso ti leptospirosis ditoy pagilian kalpasan ti nakaro a panagtudo nga epekto ti habagat a rason ti nakaro a layus.
Inbatad ni Dr. Marc Steven Capungcol, hepe ti DOH Health Emergency Management Bureau ti naiget a panagbantay dagiti health authorities ti kellaat a panagado ti kaso ti leptospirosis.
Kuna ni Capungcol a kabayatan ti Agosto 2 agingga 29 a panawen, nakairekord ti ahensia ti salun-at iti 77-porsiento nga iyaadu dagiti kaso ti leptospirosis manipud iti napalabas a dua a lawas.
Manipud Enero agingga iti Agosto 29, nabilang ti DOH Epidemiology Bureau ti di kumurang nga 6,253 a kaso ti leptospirosis iti intero a pagilian nga addaan iti 378 a pimmusay.
Napaliiwna nga agarup 12 a porsiento a nababbaba dagiti kaso no idasig iti isu met laeng a period idi napan a tawen.
Binalakadan ni Health Undersecretary Gloria Balboa ti publiko a liklikan ti panagdalyasat kadagiti danum ti layus no mabalin ken ginutigotna dagiti indibidual a kasapulan a sumrek kadagiti nalayus a lugar nga agusarda kadagiti personal protective equipment kas iti botas ken waders.
Basar iti DOH, agarup 600,000 a dosis ti doxycycline ti nai-preposition kadagiti 17 a lokal government units.
