LAOAG CITY – Ginutigot ni Justice Undersecretary Ian Norman Dato dagiti ubbing a makapaspasar ti bullying a saan nga agibales ngem nudiket masapul nga agkiddaw ti tulong kadagiti otoridad, mangisursuro, nagannak, wenno dadduma pay a responsible a natataengan.
Segun ken ni Dato, kumarkaron ti problema ti bullying ken kinaranggas kadagiti pagadalan a rason a nangipasa ti House of Representatives ti gakat a mangideklarar iti Setiembre kas National Bullying Awareness Month.
Kunana nga adda dagiti otoridad ken programa ti Department of Education (DepEd) ken Department of Justice (DOJ) tapno sungbatan ti bullying ken kinaranggas kadagiti pagadalan. Adda dagiti mangisursuro, guidance counselor, ken dadduma pay nga eksperto kadagiti pagadalan a mabalin a pagpatulongan no adda dagiti naglabsing iti linteg pakairamanan ditoyen ti libre a legal assistance.
Innayon ni Dato, a mabalin a physical, psychological, emosional, verbal, cybery, social wenno gender-based ti bullying. Saan laeng a ti biktima ken ti bully ti karaman ditoy ngem nudiket pakairamanan dagiti saksi wenno adda ti ammo da mainaig iti insidente, kasta payen dagiti tao a nagtignay tapno protehiran ken suportaran ti biktima.
