LAOAG CITY – Agtalek ti Department of Justice a maisubli ditoy Pilipinas ti dati a Negros Oriental 3rd District Rep. a ni Arnolfo Teves Jr. manipud iti Timor Leste.
Segun ken ni Department of Justice spokesperson Mico Clavano, daytoy ket para iti dati a mammanday-linteg a mangsango kadagiti kaso a naipila kontra kenkuana mainaig iti pannakapapatay ni Negros Oriental Governor Roel Degamo.
Innayon ti opisyal a kasapulan daytoy tapno masigurado ti balligi iti kaso nga extradition ket naipila iti uneg ti 40 nga aldaw a deadline.
Adda met ti 30 nga aldaw a deadline ti kampo ni Teves a mangipila iti Motion for Reconsideration ti Extradition Request kontra kenkuana.
Maipalagip a ni Teves ti maipagarup a mastermind iti pannakapapatay ni Degamo ken siam pay nga indibidual idi Marso itay napan a tawen.
Impasigurado ti Department of Justice a saan nga apektaran ti kasona nga extradition ti kiddaw ni Teves iti political asylum idiay Timor Leste.
