LAOAG CITY – Inbilin ti Office of the Ombudsman ni Senador Francis Escudero a mangipasa ti counter-affidavit mainaig kadagiti alegasion ti pannakairaman iti maipagarup a flood control scandal.
Inbatad ni Assistant Ombudsman Mico Clavano nga addan iti preliminary investigation stage ti reklamo kontra iti senador isut gapuna nga iyur-uray laengen ti sungbatna tapno maituloy ti imbestigasion.
Karaman kadagiti sangsangoen a reklamo ni Escudero ti alegasion ti plunder, graft ken bribery mainaig kadagiti maipagarup nga insertions iti national budget nga adda ti pakainaiganna kadagiti flood control project.
Basar kadagiti rakurak a rimmuar iti imbestigasion, nairaman ni Escudero kalpasan a maipagarup nga inbutaktak ni dati a Department of Public Works Highways Undersecretary Roberto Bernardo nga adda dagiti proyekto nga inraman iti General Appropriations Act kasukat ti komision wenno “cut.”
Rimmuar ti alegasion nga immabot iti binilyon a pisos dagiti proyekto a naisagana para iti sumagmamano a lugar ken adda dagiti delivery ti kuarta.
Kabayatanna, naglikudan ni Escudero ti aniaman a pannakairamanna kadagiti anomalya.
Kagiddan daytoy, inpakaammo ti Ombudsman nga adda iti preliminary investigation ti nagsina a kaso kontra ken ni dati nga House Speaker ken Leyte Rep. Martin Romualdez mainaig iti kapada nga isyu partikular iti alegasion ti money laundering ken iregularidad iti national budget process.
Inlawlawag ni Ombudsman Jesus Crispin Remulla a tingtingitingen ti opisinada ti 2024 ken 2025 national budget ken mabalin daytoy nga immabot kadagiti napalabas nga administrasion basar kadagiti testimonia a naala manipud kadagiti panagdengngeg ti Senado.
Innayon pay ti Ombudsman a paset ti ebidensia dagiti rakurak a rimmuar iti Senate Blue Ribbon Committee hearings mainaig iti kontrobersial.
