LAOAG CITY – Kinumpirmaran ti Department of Justice (DOJ) a nangisumitir da ti kiddaw para iti Red Notice iti Interpol kontra ken ni Sen. Ronald “Bato” dela Rosa.
Segun iti DOJ, daytoy ket paset ti legal process tapno ipatungpal ti arrest warrant nga inisyu ti International Criminal Court (ICC) mainaig kadagiti kaso a crimes against humanity nga adda ti pakainaigan ti ‘war on drugs’ campaign ti dati nga administrasyon.
Inbatad met ti DOJ a maibilangen kas “fugitive from justice” ni Dela Rosa ken nabilinen dagiti law enforcement agencies kas ti Philippine National Police (PNP) ken National Bureau of Investigation (NBI) nga ipatungpal ti pannakaarestar ni dela Rosa.
Inlawlawag pay ti ahensya a ti Red Notice ket saan a mismo a warrant of arrest, no di ket maysa nga international alert tapno matunton ken possible a maarestar ti maysa a tao nga adda ti sangsangwen na a nadadagsen a kaso.
