LAOAG CITY – Natay ti nangiturong ti tricycle kalpasan ti panagdinnungparda iti maysa nga elf truck iti paset ti Manila North Road iti Barangay Baay iti siudad ti Batac.
Ti biktima a nangiturong ti tricycle ket agtawen ti 61, naasawaan ken residente ti Barangay Darayday ditoy siudad ti Laoag.
Ti nangiturong ti elf truck ket agtawen ti 36, naasawaan ken residente ti Barangay Tubburan iti ili ti Bacarra.
Ti nangiturong met ti pick up a White Ford Ranger ket agtawen ti 42 ken residente ti Barangay Baay iti siudad ti Batac.
Basar iti Batac City Police Station, kabayatan a dumaldalyasat ti tricycle nga agturong nga agpa-amianan ket nag-overtake daytoy iti sarsarunnoenna a pick up.
Nupay kasta, saan a naripar ti nangiturong ti tricycle ti sumungsungad nga elf truck nga agturong met nga agpa-abagatan a nangitunda ti panagdinnungparda.
Gapu iti daytoy, nagsagaba ti nakana a sugat iti ulo ti nangiturong ti tricycle ken naideklar a dead on arrival babaen ti attending physician a ni Dr. Hayzell Joy Resurreccion, Medical Officer III idinto a dagiti nangiturong ti pick up ken elf truck ket saan a naan-ano.
