LAOAG CITY – Inlawlawag ti Department of Social Welfare and Development (DSWD) a dagiti laeng indigent a senior citizens ti kwalipikado iti Social Pension for Indigent Senior Citizens Program ti ahensya.
Inpetteng daytoy ni Assistant Secretary Ada Colico iti Department of Social Welfare and Development Protective Programs iti baet dagiti reklamo ti sumagmamano a senior citizens a saan da a makaaw-awat ti ayuda.
Inpaganetget na a ti sigurado a makaawat ti ayuda manipod iti nasao a programa ti ahensya ket dagiti senior citizen a marigrigat, addaan ti sakit, nakapuy ken saannan a kabaelan ti agtrabaho, addaan ti rangkap ti bagi ken awan ti maaw-awat na a pension wenno tulong manipod iti kapamilya ken awan ti permanente a pamastrekan na tapno masuportaran dagiti kasapulan na iti inaldaw.
Inbatad na a ti Social Pension for Indigent Senior Citizens ket programa iti babaen ti Republic Act No. 9994 wenno “Expanded Senior Citizens Act of 2010” a mangipaay ti P500 a pension iti kada bolan tapno matulungan dagiti senior citizens iti panaggatang kadagiti maintenance da.
Nupay kasta, iti babaen ti Republic Act No. 11916 wenn “An Act Increasing the Social Pension of Senior Citizens,” a naipasa iti Hulyo 2022, ket naipangato iti P1,000 ti awaten dagiti kwalipikado a senior citizens iti kada bolan.
Masakupan ti nasao a linteg ti 4,085,066 a kwaipikado nga “indigent” senior citizens iti pagilian.
Mainaig iti daytoy, immapela ni Calico iti publiko a saan a patpatien dagiti agwarwaras iti online nga agawat amin dagiti senior citizen ti pension, marigrigat man wenno babaknang.
