LAOAG CITY – Nagpanawagan ni Department of Social Welfare and Development (DSWD) Secretary Rex Gatchalian kadagiti lokal a kandidato nga agbalin a naannad kadagiti ib-ibbatan a sarita ken angaw iti panawen ti panagkampanya, kangrunaan na iti marginalized sectors.
Inaramid daytoy ni Gatchalian kalpasan ti viral video ti maysa a kandidato iti Pasig City no sadinno nga inyangaw na nga iti uneg ti maysa a tawen ket mabalin a makinaig kenkuana dagiti single mother.
Inpetteng ni Gatchalian a pudno nga agkatkatawa dagiti botanten kangrunaan na dagiti single mother iti nangngeg da ngem saanna a kayat a sawen nga ibotos da ti kandidato.
Inpalgak na pay a saan koma a tagibassiten dagiti botante kangrunaan na dagiti single mother gapu ta dagitoy ti pudno a banuar nga agsapsapul iti taraon a maidasar da iti lamisaan aniaman iti mapaspasamak.
Innayon na a dagiti single parent ket bukbukod da a mangbibiag kadagiti annak da babaen iti naiget a sakripisyo.
