LAOAG CITY – Napilaanen ti kaso a Malicious Mischief dagiti dua a lallaki a nagbakal ti truck iti paset ti Brgy. #17 Tabug idiay ciudad ti Batac.
Nabigbig dagitoy a da Nardito Mabanag Jr. y Bunagan, 18, awanan ti asawa, helper ken residente iti Brgy. 53-A Barit, ditoy ciudad ti Laoag ken ni Isaac Barandoc, 18, awanan ti asawa, helper ken residente iti Brgy. San Isidro, Luna Apayao.
Ummuna iti daytoy, nagreport da Rafael Duque y Safranca, 23, awanan ti asawa, driver, ken residente of Brgy. 26 Parangopong iti ciudad ti Batac ken ni Linbergh John Ligot y Herones, 25, awanan ti asawa ken residente iti Brgy. Tabug iti nasao met laeng a ciudad a nabakal ti nagluganan da a truck bayat nga agpaamyanan a direksyon a nakabuongan ti windshield.
Iti panagimbestigar ti PNP-Batac, nakita dagiti otoridad a nakalemmeng dagiti dua a suspek iti nasipnget a paset ti lugar.
Naamoan a dagiti dua a suspek ket adda iti impluwensya ti nasanger idi binakal da ti nasao a truck.
