LAOAG CITY – Nagpositibo ti search operation nga inyuswat dagiti kameng ti Philippine National Police iti Barangay Napo iti ili ti Badoc.
Nabigbig ti subject ti operasyon a ni Mr. Edilbert Rondal y Domingo, agtawen ti 57, maysa a mannalon ken residente ti nasao a barangay.
Kas resulta iti nasao nga operasyon, nakita dagiti otoridad dagiti pito a bala para iti kalibre 45 a paltog ken lima a bala para iti M16 rifle a paltog a nakaparabaw iti daan nga aparador nga adda iti likod ti pagtaengan ni Rondal.
Nakalanad iti search warrant a dagiti sukimaten dagiti otoridad ket kalibre 45 a paltog ken balbala.
Mainaig iti daytoy, naglikudan ni Rondal a kukua na dagiti narekobre a balbala ken patyen na a naimula gapo ta saan a pulos a nagik-ikot ti anyaman a klase ti paltog.
Inadmitir na nga iti naglabas ket adda basol gapu ta maysa isuna kadagiti simmuko ngem inpetteng na a nagbalbaliwen.
Kabayatanna, kuna met ni Barangay Captain Rogelio Dahilig a nakita na ti panagbalbaliw ni Rondal iti laksid dagiti naaramid na a basol iti naglabas.
Inbatad na a saan na met nga ammo no apay nga adda ti nakita wenno narekobre dagiti otoridad a bala iti balay ni Rondal.
Innayon na nga iti Barangay da ket awan ti rekord ni Rondal pakaseknan iti panagikot na ti paltog wenno nagpappaputok usar ti nasao a klase ti paltog.
iti sabali a bangir, kinumpirmaran ni Police Captain Artemio Clemente, chief of police ti Badoc a nagnegatibo ti resulta ti maysa pay a search operation iti nasao met la nga ili.
Nabigbig ti subject ti operasyon a ni Mr. Reynaldo Tabuyo, agtawen ti 54 ken residente iti Barangay Sta. Cruz Sur.
Segun kenni Clemente, inyuswat da ti nasao nga operasyon gapo ta karaman iti listaan ni Tabuyo kas miembro ti saan da pay a mabigbig a criminal gang.
Kunana a gapo ta adda ti nagan ni Tabuyo iti listaan ti criminal gang ket mabalin met a maysa daytoy kadagiti maaw-awagan a “gun for hire”.
Kabayatanna, kinumpirmaran pay ni Clemente nga uray ni Rondal ket maipagarop a miembro pay ti criminal gang ngem saan da nga agpada iti grupo ni Tabuyo.
