LAOAG CITY – Balligi a naarestar dagiti dua a wanted person iti siudad ti Batac babaen ti nagtipon a pwersa ti PNP-San Nicolas ken 2nd INPMFC ken ti bileg ti warrant of arrest.
Segun ken ni PCpl. King John Savado, imbestigador ti PNP-Batac, immuna a natiliw iti Brgy. 16-Quiling Sur iti nadakamat a siudad ti akusado a ni Mauro Mazo y Santos, agtawen ti 27, awanan asawa ken residente iti Brgy. 1-S Valdez, Batac City.
Simmaruno a natiliw ti akusado a ni Ian Jericho Sapaden y Paguibitan, agtawen ti 23, awanan asawa, residente iti Brgy. 7 Caunayan ket Top 6 wanted person iti siudad ti Batac.
Mainaig iti daytoy, kuna a naarestar dagiti dua gapu iti kaso murder basar iti nakaipalon ti warrant of arrest ni Hon. Felix G Salvador, Presiding Judge ti Regional Trial Court, First Judicial Region, Branch 17, Batac City ken napetsaan ti Pebrero 9, 2021.
Naamoan a dagiti akusado ket dagitoy ti adda iti likudan ti pannakapapatay ti maysa a lalaki itay napan a tawen iti paset ti Brgy. Ricarte.
Innayun ni Savado nga addan ti tallo nga immunan a natiliw a kakadua metlaeng dagiti akusado iti nasao a panagpapatay ken maysa pay ti agtultuloy a masipsiputan.
