LAOAG CITY – Naisyuan ti citation ticket dagiti dua nga indibidual gapo iti panangiyuswat da ti quarry operation iti Visaya River bisinidad ti Brgy 15 iti ili ti Vintar.
Daytoy ti kinumpirmaran ni Police Captain Roi Manuel Ordonio, ti chief of police iti ili ti Vintar.
Nabigbig met dagiti nagmaneho ti 10-wheeler dump truck nga addaan ti plate number a NBX 7486 a ni Mark Anthony Dacuycuy, agtawen ti 35 ken residente iti Brgy. 15, Visaya, ken ti pay loader nga agmaris ti yellow ket inmaneho ni Alfred Ibana, addaan ti legal nga edad.
Segun kenni Ordonio, awan ti permit dagiti maseknan para iti panangiyuswat da ti quarry iti nadakamat a karayan.
Gapo iti daytoy ket naisyuan ti citation ticket dagiti maseknan ken nagtalinaed met iti kustudiyar ni Brgy chairman Jesus Balanay ti payloader idinto a ti 10-wheeler dump truck ket adda iti Philippine National Police.
