LAOAG CITY – Agtalinaed ni dati a Presidente Rodrigo Duterte iti babaen ti International Criminal Court (ICC) uray ideklarar nga “unfit for trial” wenno saannan a kabaelan a sumango iti panangtingiting basar ken ni International Criminal Court Assistant to Counsel Atty. Kristina Conti.
Iti rakurakna iti Facebook, inbatad ni Conti a no mapaneknekan a saanen a fit ni Duterte para iti panangtingiting ti kaso ket i-adjourn wenno temporario nga isardeng ngem saan a maibasura.
Inbilin ti Pre-Trial Chamber ti International Criminal Court ti panangiwayat ti medical examination ken ni Duterte tapno maduktalan no kabaelanna pay laeng ti makipaset kadagiti pre-trial proceedings pakairamanan ti confirmation of charges.
Bukbuklen ti medical panel ti forensic psychiatrist, neuropsychologist ken geriatric and behavioral neurologist a mangdeterminar no adda ti kondision ti dati a Presidente a mabalin a makaapektar iti pannakipasetna.
Inbatad ni Conti, manamnama nga aglippas ti report ti panel inton Oktubre 31, 2025, ken daytoy ket agtalinaed a kumpidensial.
Inawagan ni Conti a “particularly contentious issue” ti salun-at ni Duterte gapu iti maipagarup nga agsusupadi a rakurak ken nalidem nga impormasion mainaig iti daytoy.
Inruar ti International Criminal Court kadagiti naglabas a lawas ti redacted summary ti Document Containing the Charges (DCC) kontra ken ni Duterte.
Iti dokumento, kinasoan isuna ti tallo a bilang ti murder kas crime against humanity pakairamanan ti panangpapatay idiay Davao City idi panawenna kas Mayor (2013–2016);
Panangpapatay kadagiti “high-value targets” iti intero a pagilian idi isuna ti nakatugaw a Presidente (2016–2017);
Murder ken attempted murder iti barangay clearance operations (2016–2018).
Dinakamat ti prosekusion ti 49 nga insidente nga adda ti 78 a biktima tapno paneknekan dagiti pammabasol.
Inarestar ni Duterte idi Marso 11 apaman a simmangpet manipud idiay Hong Kong iti pammilin ti International Criminal Court ken inkabilda isuna idiay The Hague, Netherlands iti kapada nga aldaw.
Idi Marso 14, simmango daytoy iti Korte ti International Criminal Court iti babaen ti video link.
Ti confirmation of charges hearing a naikeddeng koma idi Setiembre 23 ket naitantan kalpasan a nagkiddaw ti postponement ti depensa.
Nagkedkedan met ti International Criminal Court Pre-Trial Chamber ti kiddaw ti kampona nga interim release wenno temporario a pannakawaya-waya kabayatan ti pannakatingiting ti kaso.
