LAOAG CITY – Agtultuloy ti napintas a panagay-ayam ti Filipino pole vault star a ni EJ Obiena kalpasan a nagun-odna ti maika-7 a baliktokna iti agdama a season iti International Stabhochsprung Meeting iti Jockgrim, Germany.
Nairekord ni Obiena ti 5.83 meter high a gapu a naala na iti kampeonato, sumagmamano nga aldaw kalpasan a nagballigi daytoy iti Halberstadter Hohenflug.
Nakalamang ni Obiena ken ni Siefeldin Abdelsalam ti Qatar iti babaen ti countback kalpasan nga agpada a nalagto dagitoy ti 5.83 meters.
Nagun-od met ni Ersu Sasma ti Turkey ti bronze medal kalpasan ti record na a 5.77 meter high iti 12-man competition.
Kabayatanna, pinadas ni Obiena a labsan ti 5.93 meter tapno mairekord ti season-best-na ngem saanna daytoy naatarpan.
Inadmitir met ti Filipino pole vault star a saan a nagbalin a nalaka ti kompetision gapu iti sumagmamano a problema iti warm-up ngem naragsak latta daytoy iti nagbalin a resulta ti labanna.
