LAOAG CITY – Palawaen ni United States State Department ti screening-da iti social media accounts dagiti foreign journalist nga agaplikar ti visa tapno agtrabaho idiay Estados Unidos.
Ti nasao nga addang ket paset iti babaen ti napalawa a pagannurotan ti administration ni United States President Donald Trump idi mangrugi ti maikadua a terminona idi Enero 2025.
Mainaig iti daytoy, kasapulan pay nga aramiden a public dagiti aplikante dagiti social media accounts-da tapno matingiting dagiti opisial ti Estados Unidos.
Naammoan a pakairamanan pay iti nasao nga screening dagiti aplikante para iti sumagmamano a work visas dagiti mangmangged nga aggapu iti Canada ken Mexico.
Nupay saan pay kinumpirmaran ti United States State Department ti linaon ti internal memo, kunana nga inaramidda ti “online presence vetting” tapno masigurado a kualipikado dagiti aplikante iti babaen ti linteg ti Amerika ken saan a pangta iti nasional a seguridad, kinatalged ti publiko wenno nasional nga interes.
Kuna pay ti ahensia nga addaan ti visa officer iti nagduduma a wagas iti panangtingiting dagiti aplikasion tapno maliklikan ti panagswitik ken maprotehiran ti seguridad ti pagilian.
Kabayatanna, awan pay ti nalawag a petsa no inton ano a maipatungpal ti napalawa a pagunnurotan.
