LAOAG CITY – Agtultuloy ti panangatake iti militar ti Estados Unidos kontra iti Iran nga umaboten iti maika-13 a nagsasaruno a rabii.
Basar iti Iranian state media, uppat ti natay ken lima ti nasugatan iti kaudian nga airstrikes a timmama kadagiti pasilidad militar ken komersial iti Bandar Abbas ken Qeshm Island.
Inbatad ni United States President Donald Trump nga usaren ti Washington dagiti naka-freeze a sanikua ti Iran tapno bayadan ti aniaman a pannakadadael kadagiti barko, kargamento ken dadduma pay mainaig iti operasion.
Inawaganna daytoy a “fair and equitable,” ngem kinontra daytoy ni Iranian Foreign Minister Abbas Araghchi kas maysa a narisgo a pagalagadan.
Basar iti United States Central Command (Centcom), tinarget ti operasionda dagiti Iranian military command centers, drone storage facilities, communication networks, coastal surveillance sites ken maritime capabilities tapno pakapsuten ti kabaelan ti Iran.
Kagiddan daytoy, nangitunda ti panagdanag dagiti panangatake dagiti Iran-backed Houthis iti dua a Saudi tankers iti Red Sea isut gapuna iti panagngato ti presio ti langis iti sumurok $100 iti kada bariles, ti kangatoan sipud idi Mayo.
Naammoan a maymaysa a tanker laeng ti nakadalyasat iti Strait of Hormuz idi Hulio 24, ti kababaan a bilang sipud idi Mayo 7 a mangipakpakita ti nakaro nga epekto iti world business.
