LAOAG CITY – Inpakaammo ni Sangguniang Panlungsod Member Bismark Quidang, alumni regent iti Mariano Marcos State University (MMSU) iti ciudad ti Batac nga adda ti agarop 120 nga estudyante ti unibersidad a naistranded iti pagkaseraan ken iti dormitoryo ti unibersidad.
Gapu iti daytoy, inbatad ni Quidang a dagus a nakikoordinar da iti nasao nga unibersidad tapno maamoan na no mano amin ti naistranded nga estudyante iti ciudad.
Segun kenkuana, kalpasan a naala da ti listaan ti nagan dagiti naistranded nga estudyante ket inurnus da a dagus ti pondo nga igatang da ti relief goods.
Mangnamnama ti konsehal nga ita a lawas ket makagatang dan ti relief goods ken maited dan kadagiti nasao nga estudyante.
Innayon na nga alisto da laeng a maibunong dagiti relief goods gapu ta ammo dan no ania a barangay ken pagkaseraan dagiti maseknan nga estudyante.
Inpakaammo ni Quidang a saan laeng a dagiti agkaskasera ken agdodorm iti ciudad ti Batac ti ipaayan da ti tulong no di ket uray dagiti estudyante ti MMSU a naistranded ditoy ciudad ti Laoag, ili ti Currimao, Dingras ken Paoay nga ayan ti main campus ti unibersidad.
