LAOAG CITY –Agbalin a special non-working holiday ti Agosto 13 iti kada tawen ditoy probinsia.
Daytoy ket kalpasan a naaprobaran iti maikatlo ken maudi a pannakaibasana iti kamara de representantes ti House Bill No. 982 nga intandudu ni Cong. Angelo Marcos Barba iti maikadua a Distrito ti probinsia.
Gagem daytoy iti panagkaykaysa ti Ilocos Norte a mangrambak iti panagkasangay ti nabigbig a “master weaver” ken “Ilocano icon” a ni National Living Treasure Magdalena Gamayo.
Naammoan nga daytoy ket mapagbalin kas naan-anay a linteg ket mabigbig ti nasao nga aldaw a kas “Magdalena Gamayo Day”.
Kabayatanna, maiyur-uray ti pannakaitandudu ti maiyataday a gakat iti senado ken kalpasanna ket mapaaprobaran iti babaen ni Pres. Ferdinand R. Marcos Jr. para iti pannakapagbalinna a linteg.
