LAOAG CITY – Naituding ti panagtuloy ti face-to-face a klase dagiti estudiante iti San Jose National High School iti Tacloban City iton Lunes, Hulio 6.
Bayat ti manamnama a panagsubli ti klase, inkari ni Tacloban City Mayor Alfred Romuldez nga agimbitarda dagiti “entertainers” kas paset ti emotional healing dagiti estudiante a permi a naapektaran iti napasamak a pammaltog iti nadakamat a lugar.
Inbatad ni Department of Education Tacloban City Division Information Officer, Dr. Nilo Eder nga agtultuloy ti panangipatungpalda ti nair-irot a seguridad iti pagadalan.
Mainaig iti daytoy, rinugiandan ti panangikabil ti perimeter fencing iti aglawlaw ti campus ken panangikabit kadagiti Closed-Circuit Television (CCTV) cameras iti lugar.
Malaksid iti daytoy, nangiwayatda pay ti repainting iti pagadalan aglalo kadagiti kuarto a nakapasamakan ti pammaltog.
Maipalagip nga adda ti maysa nga insidente ti pammaltog iti nadakamat a pagadalan idi Hunio 22, no sadinno ket tallo nga estudiante ti natay ken ado dagiti nagsagaba ti sugat a rason ti temporario a pannakasera ti San Jose National High School .
Kabayatanna, planplanoen ti Department of Education ti panangipan dagiti metal detectors iti pagsungadan dagiti dadakkel a pagadalan iti Tacloban kas paset ti nair-irot a seguridad para kadagiti estudiante ken mangisursuro.
