LAOAG CITY – Inpakaammo ni Vice Mayor Jonathan de Lara iti ili ti Solsona nga agsublin iti pagadalan dagiti agad-adal ken mangisursuro intono bigat, Setyembre 15, kalpasan ti pannakasuspenso ti face-to-face classes idi Setyembre 9 agingga iti 12 gapu iti bigla a panagngato ti kaso ti Hand, Foot and Mouth Disease iti nasao nga ili.
Nupay kasta, kuna ni de Lara a saan pay a mapalubusan nga agsubli iti pagadalan dagiti day-care pupils.
Inbatad na nga uray dagiti agad-adal a naapektaran ti nasao a sakit ket saan a makasubli iti pagadalan no awan ti maipakita da a sertipikasyon manipod iti Municipal Health Office iti ili ti Solsona.
Mainaig iti daytoy, inadmitir ni Bise Mayor de Lara nga inpagarop na idi ket nakaro ti Hand, Foot and Mouth Disease isut gapuna a kalpasan a naamoan na a dagiti laeng ubbing ti maapektaran iti nasao a sakit gapu ta nakapuy ti immune system da ket naalay-ayan metlaeng ti panagamak na.
Innayon na nga iti panagsublin iti face-to-face classes ket in-require na kadagiti pagadalan a masapol nga agusar da ti facemask ken ugalien ti agbuggo ti ima ken agusar ti alcohol tapno masigurado a natalged dagiti estudyante ken mangisursuro iti nasao a sakit ken saanen a manayunan ti bilang dagiti nairekord a kaso iti nadakamat nga ili.
Kuna pay ni de Lara a nakisarita iti Municipal Disaster Risk Reduction and Management Office tapno mangipaay ti facemask ken alcohol kadagiti pagadalan kalpasan a naamoan na nga awan ti pondo dagito
Maipalagip nga immunan nga inrakurak ni Mayor Joseph de Lara iti ili ti Solsona a sipud idi Enero ita a tawen ket nakairekord dan ti 151 a kaso ti nasao a sakit no sadinno nga ita laeng a bolan ti setyembre ket addan ti 76 a kaso nga ibilang na a makaalarma.
