LAOAG CITY – Nakasagana nga agpila ti kaso ni dati a Mayor ti ciudad ti Laoag Roger Fariñas kontra iti family driver da.
Daytoy ket kalpasan iti ballaigi a “police response” nga inaramid ti PNP Laoag iti reklamo ti dati a Mayor.
Daytoy ket pakaseknan iti maipagarup a panagitaray ti family driver ti dati a Mayor a nabigbig iti nagan a Rogelio Abejuela, agtawen iti 37, addaan iti asawa ken residente iti Bgy. Nagrebcan iti ili ti San Nicolas ti trisikel da a kurongkurong.
Kuna ni Fariñas, agarup alas 10 iti rabii idi Junio 28 idi innala ti suspek ti nasao a lugan nga agbalor iti 50 a ribo a pisos a saan a nagpakpakada.
Nakigtot ti dati a Mayor kalpasan a naamuan na nga insalda ti supect ti nasao a lugan iti maysa a minatayan iti Bgy. 3 iti nasao nga ili iti agnagan iti Jefferson Domingo iti 5 a ribo a pisos.
Iti agdama ket addan iti kustodyar ti PNP ni Abejuela karaman ti narekobre nga intaray na a kurongkurong ken maisagsaganan ti kaso a qualified theft a maipila kontra iti daytoy.
