LAOAG CITY – Nagballaag ti Food and Drug Administration iti publiko mainaig iti panaggatang ken panagusar ti saan a rehistrado nga agas a San Sierra Century Balm Natural Base Oinment.
Napaneknekan iti babaen ti naiwayat a Post-Marketing Surveillance (PMS) ti Food and Drug Administration a ti San Sierra Century Balm Natural Base Oinment ket saan a dimmalan iti proseso ti rehistrasion ti ahensia ken saan a naikkan ti pammalubos kas ti Certificate of Product Registration (CPR).
Gapu iti daytoy, saan a maipasigurado ti Food and Drug Administration ti kalidad, kinatalged ken bileg daytoy.
Kayatna a saoen, ti panagusar iti nasao nga iligal a produkto ket mabalin a mangitunda ti peggad iti salun-at.
Maiyataday iti Republic Act No. 9711 wenno ti Food and Drug Administration Act of 2009, ti panagaramid, panagangkat, panaglako, panangipaay, panangiyakar ken panangitandudo ti produkto a para iti salun-at nga awan ti maiyannatop nga otorisasion manipud iti ahensia ket maipawil.
Nagutigot dagiti amin a Local Government Units (LGUs) ken Law Enforcement Agencies (LEAs) a siguradoen a daytoy a peke a produkto ket saan a mailako wenno mausar iti masakupanda a lugar.
