LAOAG CITY – Nakagun-od ti 12 a medalya ni Filipino-British Hannah White pakairamanan ti tallo a rekord iti swimming competition ti 2025 Fobisia Games a naisayangkat iti Pattana Sports Resort idiay Chonburi, Thailand.
Nangipakita ti pigsa ti pambato ti ABC International School (ABCIS) a ni White iti girls’ 50m butterfly a nagun-od daytoy ti baro a rekord a 30.81 a segundo.
Naminsan manen a binurak ti rekord ni White iti 100m Individual Medley kalpasan a naaramidna ti 1:12.09 idinto a paset daytoy ti ABCIS team a nangisubmitir ti baro a marka a 58.80 a segundo iti girls’ 4x25m freestyle relay.
Naaddaan pay ti extra a balitok a medalya ni White gapu ta naipaayan ti pammadayaw ti amin a nakagun-od ti baro a rekord iti swimming event.
Malaksid iti tallo a gold, adda pay ti maysa a silver a nagun-odna iti medley relay.
Saan laeng nga iti swimming ti nakipasetan ni White gapu ta nakita pay ti kinalaing ti multi-talented athlete iti athletics, basketball ken football events.
