LAOAG CITY – Saan a bumaba iti uppat nga indibidual ti natay kalpasan a nagdinnungpar ti dua a tren iti siudad ti Bekasi nga asideg iti kabisera a Jakarta.
Napasamak ti aksidente iti Bekasi rail station a nagdinnungpar ti commuter line train ken maysa a long-distance train.
Kinumpirmaran ti railway operator ti Indonesia nga uppat ti kumpirmado a pimmusay idinto a 38 a dadduma pay ti naitaray kadagiti kaasitgan nga ospital.
Nagballaag ni Deputy Speaker Sufmi Dasco Ahmad a mabalin a ngumato pay ti bilang dagiti biktima gapu ta agtultuloy pay ti rescue operations.
Basar kadagiti report, mapatta-patta nga innem agingga pito a tattao pay ti naipit iti uneg ti bagon isut gapuna nga agtultuloy ti panangputed dagiti rescue team kadagiti landok a paset ti tren tapno maisalakan ti dadduma pay.
Mainaig iti daytoy, iwaywayat metten ti Jakarta Police ti imbestigasion tapno maammoan ti rason ti panagdinnungpar.
Nakita ti saan a bumaba iti 20 nga ambulansia iti lugar ti insidente kabayatan a tumultulong dagiti rescuers manipud iti national disaster ken rescue agencies iti panagbakwit dagiti pasahero.
Manamnama a mangiparuk-at pay ti nayon a detalye mainaig iti insidente dagiti otoridad kadagiti sumarsaruno nga oras.
