LAOAG CITY – Nakanselar ken na-delay ti sumurok 200 a flights nga agturong ken rumuar iti sakupen ti Indonesia idiay Jakarta kalpasan ti panagalburuto ti bulkan Anak Krakatau
Malaksid iti daytoy, temporario pay a napaserraan iti Soekarno-Hatta International Airport kalpasan ti panagalburuto ti nasao a bulkan ken ti panagpusuakna ti nabengbeng a dapu no sadinno ket naapektaran dagiti sumurok-kumurang 23,000 a biahero a na-stranded gapu iti teporario a pannakaserra ti airport.
Kabayatanna, basar iti geological agency ti Indonesia, immunan a nakita dagiti sumagmamano a pagsinialan ti kinaaktibo ti nasao a bulkan idi pay laeng Sabado sakbay daytoy a nagalburuto iti oras ti 3:53 ti bigat idi Dominggo. (Western Indinesian Time).
Immabot pay iti sumagmamano a paset ti Jakarta ken iti probinsia ti Lampung dagiti dapu nga inpusuak ti nasao a bulkan.
Nupay kasta awan ti nairekord dagiti lokal nga otoridad a biktima wenno pannakadadael.
