LAOAG CITY – Nakasaganan dagiti Pilipino idiay Singapore para iti ibibisita ni President Ferdinand “Bongbong” Marcos Jr intono bigat.
Daytoy ti inbatad ni Bombo International News Correspondent Jun Riganon, tubo iti ciudad ti Batac ken agtrabtrabaho idiay Singapore ken maysa kadagiti tumultulong para iti event bayat ti panagbisita ni Pres. Bongbong Marcos.
Segun kenni Rigonan, magagaranen amin dagiti Pilipino no sadinno ado dagiti naisagana kas iti Filipino Community Gathering kadua da ti Presidente.
Inbatad na nga iti alas-tres ti malem ket mabalinen a sumrek dagiti Pilipino iti auditorium iti Natonal University of Singapore.
Kunana nga adda a sakbay a sumangpet ti presidente iti 6:00 agingga iti 6:30 iti malem ket adda ti maiyuswat a pre-programming kas iti panagkakanta, panagsasala no sadinno ket maipakita ti talento dagiti Pilipino nga adda idiay Singapore.
Apaman a makasangpet ti Presidente, manamnama ti panagbitla daytoy ken dadduma pay nga aktibidad.
Mainaig iti daytoy, kunana nga adda ti limitasyon ti venue ken amin a sumrek ket dumalan iti screening no sadinno key naisubmitir ti nagan ken dadduma pay nga impormasyon da, kasta pay a naiget ti maipaay a segirudad.
Kabayatanna, inbatad ni Rigonan a nakapatpateg ti ibibisita ni Pres. Marcos idiay Singapore para iti natibtibker pay a relasyon dagiti du a pagilyan.
Inlawlawag na pay nga idi napalabas nga eleksyon ket arig na 70 a porsiento ti nagbutos kenni Marcos rason a magagaranen dagiti Pilipino.
