LAOAG CITY – Inpakaammo ni Dr. Joseph Adaya, ti mangidadaulo iti City Health Office ditoy siudad ti Laoag nga ikarigatanda a tumulong kadagiti maseknan a residente a makagat ti ayup kas ti aso ken pusa babaen iti panangipaayda ti first dose ti anti-rabies vaccine a libre.
Nupay kasta, inpalgakna a gutigutenda dagiti maseknan a nakagat a gatangen ti maikadua ken maikatlo a dose gapu ta saan nga umdas ti pundo ti bakuna.
Mainaig iti daytoy, nagballaag ni Dr. Adaya a saan a gandaten a mapan agpatandok imbes ket dagus nga agturong iti kaasitgan nga Animal Bite Center wenno ospital tapno maliklikan ti impeksion ken pannakairisgo iti biag.
Maipalagip nga adda ti nasurok maysa a ribu nga animal bites cases ditoy siudad ti Laoag iti umuna a kuarter ti tawen 2024 idinto nga adda ti nasurok dua a ribu a kaso iti napalabas a tawen.
